Book: Isal us Salik Fi Usul e Imam Malik

اللہ کے نام سے جو نہایت مہربان، بے حد رحم فرمانے والا ہے۔ اور درود و سلام ہو ہمارے سردار محمد ﷺ پر، اور آپ کی آل و صحابہ پر، کہ خوب خوب درود و سلام بھیجا جائے۔

تمام تعریفیں اس اللہ کے لیے ہیں جس نے ہمارے نبی محمد ﷺ پر شریعت کے اجمالی اور تفصیلی دلائل نازل فرمائے۔ اور علماء کو حکم دیا کہ وہ ان روشن اور واضح انوار سے استفادہ کرتے ہوئے ان دلائل سے فروع کو نکالیں۔ اور ان معانی کو ایسا بنایا کہ وہ ہمیشہ ہمیشہ اور ابدی زمانوں تک ختم نہ ہوں۔ اور اس امت کے علماء کو ایسا بنایا کہ وہ شریعت کی تجدید کرتے ہیں، جیسے بنی اسرائیل کے انبیاء کرتے تھے۔

جب بھی ایک جماعت فنا ہو جاتی ہے، اس کی جگہ دوسری جماعت ان عالی مرتبت ذمہ داریوں کو سنبھال لیتی ہے۔ اور درود و سلام ہو ہمارے سردار محمد ﷺ پر، جو کلی شرعی اصولوں میں غور و فکر کا حکم دینے والے ہیں۔ اور جزئی فروع کے استنباط (اخذ) کا بھی حکم دینے والے ہیں۔ اور آپ کی آل اور صحابہ پر، جو علمِ شریعت میں اجتہاد کے اعلیٰ درجے تک پہنچے ہوئے ہیں۔جن کی اقتداء کرنے والا نجات پاتا ہے، کیونکہ اللہ تعالیٰ نے ان کے اقوال اور افعال کو شرعی حجت بنایا ہے۔ ایسا درود و سلام جو ہمیشہ اور مسلسل رہے، یہاں تک کہ وہ دن آ جائے جب علماء کی روشنائی کو شہداء کے خون کے ساتھ تولا جائے گا۔اور اس وقت علماء کی روشنائی وزن میں غالب آ جائے گی۔

اما بعد:

پس کہتا ہے اپنے مولیٰ کے سب سے زیادہ فقیر بندوں میں سے ایک، جو اپنے مولیٰ کے سوا ہر چیز سے بے نیاز ہے، محمد یحییٰ بن محمد المختار بن الطالب عبداللہ: یہ ایک واضح شرح ہے جسے مجھ سے اس نے طلب کیا جس کی مخالفت کی میرے لیے گنجائش نہیں، اور میری طبیعت پر اس کی مدد اور موافقت لازم ہے۔ اور وہ میرے بھائی اور محبوب عبد اللہ بن سیدی احمد ہیں۔انہوں نے مجھ سے درخواست کی کہ میں ان کے والد، مشہور اور ماہر فقیہ سیدی احمد بن محمد بن ابی کف کی منظومہ کی شرح لکھوں۔ جس میں انہوں نے امام مالکؒ کے مذہب کے اصولوں کو محض گنتی کے انداز میں جمع کیا ہے، نہ کہ ان کی ذاتی عوارض کی تحقیق کرکے۔ اور نہ ہی ان اصولوں کو حد (تعریف) کے ذریعہ بیان کیا ہے، بلکہ یاد کرنے، سمجھنے اور مستحضر رکھنے میں آسانی کے لیے، ان کے لیے جو ان اصولوں کے عوارض اور حدود سے واقف ہیں اور ان کے استعمال اور غور و فکر میں دلچسپی رکھتے ہیں۔